1) Kjalarnes / Blikdalur
2) Hafnarfjall
3) Undir Eyjafjöllum
4) Staðarsveit / Hraunsfjörður
5) Lómagnúpur / Öræfasveit
6) Lón, Álftafjörður, Hamarsfjörður og Berufjörður
7) Ingólfsfjall
8) Ennisháls
Sjá nánar hér neðan við:
1) Kjalarnes
Í norðanverðum Kollafirði og þegar keyrt er upp úr Kollafirði á vesturleið koma öflugir vindhnútar þvert á veginn á stuttum kafla í nokkuð hvassri N-átt. Þegar spáð er N-átt a.m.k. 15 m/s má nær alltaf gera ráð fyrir snörpum vindhviðum á þessum stað.Blikdalur
Við suðurmunna Hvalfjarðarganganna (á móts við vigtarplan Vegagerðarinnar) er stuttur kafli þar sem vindhviður taka oft vel í bíla í nánast sömu viðurskilyrðum og þegar byljóttur vindur er undir Hafnarfjalli.
2) Hafnarfjall
Á þjóðveginum undir Hafnarfjalli standa hviður nokkuð þvert á veginn á nokkurra kílómetra kafla. Ef veðurspáin fyrir spásvæðið Faxaflói hljóðar upp á A eða SA 15-18 m/s eða meira má reikna með að vindhviður fari að gera vart við sig. Vegagerðin hefur sett viðvörunarmerki um sviptivind á þessum stað.
3) Undir Eyjafjöllum
Á nokkrum stöðum undir Eyjafjöllum alveg frá Seljalandsfossi austur að Skógarfossi gerir slæma hnúta í A-átt. Ökutæki fjúka þó sjaldan út af á þessum stöðum þar sem hvass vindurinn er oftast samsíða ökustefnu.
4) Staðarsveit
Á u.þ.b. 15 km kafla á sunnanverðu Snæfellsnesi koma staðbundnir vindstrengir með talsverðum hviðum sem standa af fjallgarðinum. Þarna þarf að sýna aðgát þegar spáð er N-átt og a.m.k. 15 m/s á svæðinu í heild sinni. Byljóttur vindurinn í Staðarsveit fer oftast saman við hvassan vind á Kjalarnesi.Hraunsfjörður
Þegar spáð er S-átt yfir 13-15 m/s, þá blæs afar byljóttur vindurinn ofan af fjöllunum þvert á ökutæki á að minnsta kosti þremur stöðum nærri Grundarfirði. Sá skeinuhættasti er stuttur kafli rétt vestan við brúna yfir Hraunsfjörð.
5) Lómagnúpur / Örafasveit
Á litlum bletti vestan við Lómagnúp eru hviður algengar í vindi sem stendur beint af hömrum girtum Lómagnúpi. Vindáttin er þá A-læg eða NA-læg. Sjaldnast er vindur í lofti nægjanlega sterkur á sumrin til að skapa sterkar hviður, enda er þeirra helst að vænta á haustin og veturna.
Öræfasveit
Í Öræfasveit eru tveir staðir við þjóðveginn þar sem snarpar vindhviður standa af jöklinum:
Frá Svínafelli austur að Hofi gerist það í A-átt. Þegar spáð er um og yfir 20 m/s af A (stormviðvörun í gildi) má vænta að vindhnútar verði mjög hvassir á þessari leið. Það er frekar fátítt á sumrin, en þekkist þó.
Við Kvísker að austanverðu er kafli á veginum sem er ekki nema 200 metra langur þar sem fremur fátíð NV-veður demba niður mjög snörpum vindhnútar oftast í skamma stund í senn. Þessa veðurs er helst að vænta þegar spáð er N eða NV-átt, 20 m/s (stormviðvörun í gildi). Þau eru nær óþekkt á sumrin og fram eftir haustinu.
6) Lón, Álftafjörður, Hamarsfjörður og Berufjörður
Nokkrir kaflar á þjóðveginum frá Höfn austur fyrir Berufjörð eru varhugaverðir í N- og NV-átt. Þarna eru víða brött fjöll í sjó fram og þar sem vindurinn steypist fram af þeim verða gjarnan varhugaverðir sviptivindar. Ástæða er til að nefna Hvalnes og Hvalnesskriður, Hamarsfjörð á vegakafla undir brattri fjallshlíð Hálsfjalls skammt vestan við Djúpavog og um 7-8 km kafla á Berufjarðarströnd á milli Núps og Streitis. Ekki þarf sérlega hvassan vind á þessum slóðum til að fá snarpar hviður, spá upp á N og NV 13-15 m/s leiðir strax til sviptivinda. Þeir eru nokkuð algengir þarna á öllum tímum ársins.
7) Ingólfsfjall
Þar sem þjóðvegurinn á milli Hveragerðis og Selfoss liggur undir Ingólfsfjalli er á kafla ákaflega sviptivinda samt í N- og NA-áttum. Svæðið austan Kögunarhóls á móts við malarnámið í Ingólfsfjalli er sérlega varasamt.
8) Ennisháls
Í SV-vindi koma vindhviður þvert á veginn yfir Ennisháls þegar ekið er norður Strandir á milli Bitrufjarðar og Kollafjarðar. Þar efst uppi er sérlega varasamt, en aðeins í SV-átt og þarf hún ekki að vera í svæðisbundum spám nema 12-15 m/s.
