Kæru félagar.

Nú er komið að Stóru-ferðinni okkar sem verður farin um Suðurlandið og byrjar á Selfossi n.k. laugardag 11.júlí og endar að Mánagarði í Nesjahverfi skammt frá Höfn í Hornafirði.

Við vonumst til að sjá ykkur sem flest í þessari rúmlega vikuferð.  Margt er að skoða á þessari leið þó svo við höfum mörg okkar farið þarna oft þá er alltaf eitthvað nýtt að sjá og þið fáið í hendurnar góðan Leiðarvísir þar sem búið er að taka saman heilmikið efni um áhugaverða staði sem vert er að gefa gaum og þar í er einnig dagskráin fyrir alla dagana. Svo verður líka svo gaman að hittast á tjaldstæðunum og það er ýmislegt sem við gerum saman eins og dagskráin ber með sér sem fylgir hér með.

Vinaleikurinn sem hefur verið undanfarin 2-3ár verður áfram og kynntur á laugardagskvöldið ásamt nýjum leik „bjórleik“ þetta er spennandi og verður gaman að taka þátt í þessu.

Við vonum svo sannarlega að veðurguðirnir verði okkur hliðhollir og sýni okkur sína bestu hlið sem sagt sól og blíðu en við mætum með sól í hjarta og sól í sinni.

Orkan kemur að ferð okkar með því að veita félögum í Félagi húsbílaeigenda -12kr. á lítrinn bensín/olía, frá föstudeginum 11.júlí og alla ferðina til 20.júlí,  endilega nýtið ykkur þetta tilboð.

Ég vil benda ykkur á tengla á heimasíðunni okkar sem þið ættuð að skoða það er fyrst til að nefna  „Sölusíðan“  „Auglýsendur“  allir þeir sem auglýsa hjá okkur, og svo,  „Tilboð til félagsmanna“ frá fyrirtækjum sem veita afslátt til félagsmanna  og svo fyrir okkur öll sem erum að ferðast vítt og breytt þá er tengill á sölusíðunni fyrir „Tjaldstæði“ en þar eru nokkuð mörg tjaldstæði sem veita félagsmönnum afslátt af gistingu.

Einnig hefur bæst við á „TENGLAR“  þar má sjá hvar er losunaraðstaða WC.  Hvar sundlaugar eru á landinu, og nýr vefur visitingIceland.is  o.m.fl.   tenglarnir eru í stafrófsröð, mikill fróðleikur þarna.  

Dagskrá Stóru-ferðar:

Föstudagur 11. júlí (dagur 1)

Tjaldstæðið á Selfossi, Gesthús. Munið að föstudagar eru hattadagar, ekki gleyma höttunum heima.!

Laugardagur 12. júlí (dagur 2)

Fólki er bent á að kynna sér söfn og aðra afþreyingu á Selfossi. Stutt er í alla þjónustu frá tjaldstæðinu.

Kl 09.45 lagt af stað fótgangandi (vegalengd c.a. 950m)

Kl. 10.00 Brunavarnir Árnessýslu bjóða húsbílaeigendum að skoða nýja Slökkvistöð, kynningu á

notkun slökkvitækja og einnig verður sýnt hvernig menn bera sig að við að klippa bíla. Áhugavert fyrir bæði konur og karla.

Brunavarnir bjóða upp á kaffisopa að lokinni kynningu. Slökkviliðstjórinn mun sýna myndir frá ýmsum tímum og viðburðum í sögu Selfoss og fylgja þeim eftir með skýringum.

Kl. 21.00  Soffía formaður setur ferðina og fyrirkomulag ferðarinnar kynnt.

Vinaleikur og bjórpottur:

Þeir sem ætla að taka þátt komi að Mánadísinni nr. 696,  eftir að Soffía hefur lokið máli sínu.Ef einhver sem getur ekki mætt fyrr en á sunnudegi-mánudegi og vill vera með í leiknum þá biðjið vini ykkar að draga fyrir ykkur vin og afhenda þeim gjafir.

Frekari upplýsingar um leikina er svo að finna í leiðarvísir sem þið fáið afhent hjá ferðanefnd þegar þið greiðið fyrir ferðina.

 

Sunnudagur 13. júlí (dagur 3)

Selfoss – Hamragarðar (71,7 km) Tjaldstæðið er rétt innan við Seljalandsfoss er við fossinn Gljúfrabúa.

Mánudagur 14. júlí (dagur 4) Vestmannaeyjaferð fyrir þá sem hafa þegar pantað.

Kl. 12.00 Rúta leggur af stað frá Hamragörðum að Landeyjarhöfn

Tilboð pr mann með Herjólfi fyrir farþega 16-66 ára kr. 2.080 á mann (verð 1.040 kr önnur leið)

Tilboð pr mann með Herjólfi fyrir farþega + 67 ára kr. 1.040 á mann (verð 520kr önnur leið)

Kl. 13.00 Brottför frá Landeyjahöfn með Herjólfi.

Eftir komuna til Eyja er skoðunarferð um Vestmannaeyjar í rútu, félagi okkar Guðmundur Karl nr. 266 verður leiðsögumaður (2-3 tíma) komið m.a. við hjá Grími kokk.

Frjáls tími í miðbæ Vestmannaeyja að lokinni skoðunarferð.

Kl. 17.00 Mæting í Herjólf og brottför 30 mín seinna. Rútan skilar okkur í Hamragarða.

Þriðjudagur 15. júlí (dagur 5)

Hamragarðar – Vik í Mýrdal (59,1 km)

Gist verður á tjaldstæðinu. Margir áhugaverðir staðir á leiðinni til að skoða, Skógarfoss – Minja og samgöngusafnið að Skógum – Gestastofan á Þorvaldseyri og Seljavallalaug, Dyrhólaey,margir hellar eru undir Eyjafjöllum sem vert er að gefa gaum.

kl. 20.30 Guðný Guðnad. mun ganga með okkur um Vík og segja okkur eitthvað markvert um staðinn, gaman væri að enda svo á einhverjum pöbb á Vík..

Miðvikudagur 16. júlí (dagur 6)

Vík í Mýrdal – Skaftafell (140 km)

Áhugaverðir staðir eru: Þakgil – Laufskálavarða – Hrífunes – Fjaðrárgljúfur – Systrastapi og Systrafoss –Kirkjugólfið – Foss á Síðu – Dverghamrar – Orrustuhóll – Núpstaður (ef hann er opinn ferðamönnum). Gist verður á tjaldstæðinu í Skaftafelli.

Kl. 20.30 Leikir: Hér vantar 4 í hvert lið – Ratleikur sem hefst við Bláa naglann nr 233. (Hafið með ykkur blýant/penna)

Fimmtudagur 17. júlí (dagur 7)

Í Skaftafelli eru ótal gönguleiðir og er bent sérstaklega á Svartafoss.

Kl. 19.00 Hér væri kjörið að raða borðum á einn stað og borða saman. Fróðleikur og bingó. Kl. 20.00 Kristján Benediktsson nr. 529 segir frá áhugaverðum stöðum af leiðinni sem ekin verður á morgun. Bingóspjöld seld fyrir og eftir mat. Glæsilegir vinningar.

Föstudagur 18. júlí (dagur 8)

Skaftafell – Mánagarður í Neshverfi (127 km)  Munið föstudagar eru hattadagar.

Helstu staðir á leiðinni eru: Jökulsárlón – Þórbergsetur – og munið að horfa á landslagið.

Kl. 21.00 Kvöldvaka í Mánagarði. Söngbókin tekin fram – Vinaleikur upplýstur – Útsvar

Allir að mæta með söngbækur og hljóðfæri. Leikin verður tónlist af hljómplötum fyrir þá sem vilja dansa fram til kl. 24.00 ef stemning er góð.

Laugardagur 19. júlí (dagur 9)

Kl. 12.00 Stillt upp fyrir markað.

Kl. 13.00 – 15.00 Markaður félagsmanna.

Eftir markaðinn röðum við borðum og stólum fyrir lokahófið.

Kl. 20.00 Lokahóf.

Hátíðarkvöldverður  Hlaðborð mjög góður, frá Hótel Höfn- Skemmtidagskrá – Bílahappadrætti – Ratleiksvinningur og dansleikur með         Danshljómsveit Friðjóns Jóhannssonar.

Sunnudagur 20. júlí (dagur 10)

Takk fyrir samveruna og góða ferð heim eða áfram í fríið.

Njótum samverunnar, eigið öll góðar stundir.

Sjáumst f.h. Stjórnar, ferða-og skemmtinefndar

Soffía G. Ólafsdóttir, formaður.

Ágætu félagar.  27.-29.júní  eða næstu helgi er 4. ferðin okkar   og er hún á Sólseturshátíðina  í Garðinum hátíðin er haldin út við Garðskagavita. Þegar við settum þessa ferð á í vetur voru upplýsingarnar sem við fengum þær að ekkert gjald yrði tekið á tjaldstæðinu enda á tjalda.is er tjaldstæðið auglýst frítt. Í síðustu viku heyrðum við af því að þeir sem sjá um hátíðina í ár ætli að rukka 2.000,–kr. pr. bíl  alla helgina með rafmagni óháð hvað margir eru í bílnum, svo heyrist núna að þetta eigi að vera 2.500,– kr. helgin en þetta er allt mjög óljóst sem er miður þar sem við höfum þá fengið rangar upplýsingar í byrjun. Ef af þessari gjaldtöku verður þá verður hver og einn að greiða fyrir sig að þessu sinni. Við látum dagskrána fylgja hér með og við vonumst til að sjá sem flesta í þessari ferð. 

f.h. Stjórnar,ferða-og skemmtinefndar.

Sof´fia G. Ólafsdóttir, formaður.

Orkan tekur þátt í hvítasunnuferðinni hjá Félagi
húsbílaeigenda með því að gefa þeim sem eru með kort eða lykil frá Orkunni
-12kr. afslátt af verði bensins eða olíu, dagana 6.-9.júní n.k.
Vonandi geta sem flestir nýtt sér þetta góða tilboð. Eigið góða hvítasunnuhelgi

Hvítasunnuhelgin að Goðalandi 6.-9.júní 2014
Hér kemur dagskrá helgarinnar, ef þið viljið hafa þetta í bílunum hjá ykkur þá endilega prentið þetta út, gott að geta fylgst með, því það er margt að gerast og við munum eftir fremsta megni fara eftir tímasetningunum eins og þær eru gefnar upp í dagskránni. Gjald er það sama og á s.l. ári . fyrir félagsmann 4.000 kr.18.ára og eldri Gestir greiði 5.000 kr. 18.ára og eldri
Hlökkum til að sjá ykkur. Sjáumst. Stjórn, ferða-og skemmtinefnd.
Dagskráin fyrir hvítasunnuhelgina
Reynum að byrja alla dagskrárliði stundvíslega !
Föstudagur 6. júní: 
Hattavinafélagið: Föstudagar eru sérstakir hattadagar og er félagsmönnum uppálagt að ganga með hatta þá daga að viðurlagðri skömm og hneisu, sem skammari sér um að framfylgja á næsta fundi/atburði á vegum félagsins.
 Ökuleikni: Fljótlega eftir að skemmtinefnd mætir á svæðið þá mun hefjast “Ökuleikniskeppni” 
1. Hver bíll byrjar með 300 stig. Aka upp á planka og nema staðar með hægra framhjól upp plötu og á miðja dekksins að vera á striki sem málað er á plötuna. 
2. Bakka síðan milli tveggja prika og nema staðar við prik sem staðett er 4 metrum frá. (bannað að nota bakkmyndavél) Til að fá fullt hús þarf bifreiðin að nema staðar 2 cm frá prikinu. Fari bifreið fram yfir þá tvöfaldast refsistigin.
3. Aka næst að priki sem er 50 cm hátt og nema staðar 2 cm frá prikinu. Fari bifreiðin of langt tvöfaldast refsistigin. 1 cm er 1 stig.                             
 Verðlaun fyrir þrjú efstu sætin verða afhent í lokaferð 27. september í Árnesi.
17:00  *Stilla upp í Félagsheimilinu fyrir kvöldskemmtun*
21.00-01:00 Hátíðin sett og sungið upp úr söngbókinni. Muna að taka hana með !!!
Félagar hvattir til að taka með sér hljóðæri og spila með. Í lokin verða leikin danslög af hljómplötum og þar koma línudansarar sterkir inn                                    
Laugardagur 7. júní: 
12:00 *Félagsheimilið opnað fyrir markaðsundirbúning*
13:00-14:00  Hestamenn frá Miðhúsum teyma hesta sína undir börnum
13.00–15.00  Markaður í Félagsheimilinu 
15:00 Börnin horfa til himins !  
15:00 Forsala á Bingó- spjöldum   *Stilla upp fyrir bingó*
15:30    Bingó, margir góðir vinningar *Stilla upp fyrir dansleik*
22.00–02:00 Hljómsveitin Sófar leikur fyrir dansi
Sunnudagur 8. júní: (Hvítasunnudagur)
12:30 *Stilla upp fyrir félagsvist*
13:00  Félagsvist   *Eftir félagsvist: Stilla upp fyrir kaffið*
15:00  Hvítasunnukaffi í boði félagsins.  
16:30  *Stilla upp fyrir ball*
21:00  John töframaður sýnir listir sínar. Hæfileikakeppni, Verðlaunaafhending, 
 Sungið upp úr söngbókinni. Útsvar, Félagsmenn hvattir til að koma með hljóðfærin sín  og spila saman.
 Danslög leikin af hljómplötum 
Mánudagur 9. júní: (Annar í Hvítasunnu)
12:00  *Hjálpa til við frágang í Félagsheimili* 
 Vonandi skemmtu sér allir vel.
 Góða ferð heim !
Skemmtinefnd hvetur félagsmenn til að versla við eftirtalda aðila sem gefa vinninga í ferðir félagsins í sumar.
Víkurverk, Rafgeymsalan,Orka, Bílaraf, Atlantsolía, Olís, N1,Orkan,skeljungur, Góa, Borgarleikhúsið, Ás styrktarfélag , Askur, KFC, Fjörukráin, Gamlavínhúsið, Ólafur Gíslasson, Ullmax, Automatic, Laxnes horse, Brammer, Málningarvörur, Wurth, Pólýhúðun,

Lokaferðin sem jafnframt er Árshátíð félagsins verður í Félagsheimilinu Árnesi í Skeiða- og Gnúpverjahreppi 99 km frá Reykjavík. Unnið er að undirbúningi þessarar ferðar og er ykkur alveg óhætt að láta ykkur hlakka til.Eins og Daði, Elín, Einar og Dóra sögðu á ferðafundinum þá eru þau að safna vinningum í ferðirnar okkar og einnig að brydda upp á ýmsum nýjungum s.s. hæfileikakeppni, akstursleikni í bland við „útsvarið“ kubbaspilið, bingó, spilavist, bridge sem hefur verið hjá okkur en þetta byggist líka á að við tökum öll þátt í því að gera öll eitthvað saman, hafa „GAMAN SAMAN“ . Ég minni ykkur á að skrá ykkur í hæfileikakeppnina, útsvarið og akstursleiknina hjá skemmtinefndinni, koma svo gott fólk.

12.-14.sept. Varmaland; Furðufata/Grímuball
jibbí, nú skuluð þið fara að undirbúa gerfið!!!, þarna er Útilegukortið og gerir fólk sjálft upp við staðarhaldara, annars er gjaldið 600,– kr. pr. mann pr. Nótt en rafmagn er 1.500,– kr. á sólarhring. Þarna erum við með hús og einnig verður ball á laugardagskvöldinu, félögunum að kostnaðarlausu.

29.-31.ágúst Kleppjárnsreykir gjaldið er 2.500 kr. fyrir bílinn og 1.000 kr. rafmagnið og greiðir fólk hjá staðarhaldara. Vonandi verður veðrið gott og við getum leikið okkur úti en dagskrá verður birt á heimasíðunni þegar nær dregur.

15.-17.ágúst Hótel Eldborg. Laugagerðisskóli – Danir í heimsókn,
Félagið býður upp á kjötsúpu og við getum haft afnot af sal ef veðrið verður ekki gott. Útilegukortið gildir þarna, annars kostar fyrir manninn 1.000 kr. pr. nótt og hver og einn greiðir fyrir sig hjá staðarhaldara. Við vonum að veðurguðirnir verði okkur hliðhollir og skemmtileg stemming myndist með Dönunum. Dagskráin er í smíðum.

Stóra ferð Félags húsbílaeigenda 11. – 20. júlí 2014
Sama verð er á Stóru-ferðinni og var á s.l. ári, félagsmaður greiðir 7.000kr. gestir 8.500 kr. Þeir sem fara til Eyja borga 8.000 kr. og gestir 9.500 kr. fólk greiðir sjálft í Herjólf en fyrir Ellilífeyris +67 ára kostar fram og til baka kr.1.260,pr.mann og fyrir aðra farþega fram og til baka pr. mann 16.-66 ára kostar kr. 2.520,–
Ferðin hefst á tjaldstæðinu á Selfossi og endar á tjaldstæðinu í Nesjahverfi 8 km áður en komið er að Höfn í Hornafirði.